《小傳日記》唔使問阿貴，今日（１７日）焦點當然非股王ＱＱ（００７００）莫屬。噚日
（１６日）收市之後，ＱＱ終於派發首季成績表，多賺６１巴仙至２３３億人仔，勝孖屐預期，
手遊收入都有６８巴仙增長！經過一晚之後，各大行都爭住出報告評價。總括而言，普遍大行都
繼續睇好，高盛更上調目標至５４６銀，兼調高今年收入預測，但仍有分析提醒，小心第二季手
遊增長會減慢。
首季成績咁省鏡，ＱＱ今朝競價已裂口高開７巴仙，不過升到去４２４﹒２銀就停咗，睇嚟
缸友都係趁好消息出貨，全日埋單得番近４巴仙進帳收４１１銀，守唔住條５０天線
（４１６﹒５銀）。
ＱＱ一向左右住香江魚缸命運咁滯，今朝裂口高開果陣，成功帶領魚缸高開３０６點至
３１４１６，一心諗住有ＱＱ沖一沖喜，魚缸可以向住三萬二進發！可惜，事與願違，ＱＱ無後
勁，祖國錢莊又腳軟，搞到魚缸單日轉向，倒跌１６８點收埸，報３０９４２；國指就跑輸大市
，碌低１６１點報１２２７８，認真無癮。成交更增加１１巴仙至１１１３億銀添。
＊阿仔遭罸款工行好憂怨，大小象除淨腳軟有損失＊
雖然惠譽先前上調三位內銀佬嘅存續評級，包括工行（０１３９８）、建行（００９３９）
同埋中行（０３９８８），不過好似對今日嘅走勢無咩特別幫助，成班街坊街里拖住齊齊碌低。
工行旗下工銀金融遭花旗國罰款，跌低近２巴仙，報６﹒７５銀，失守咗多條主要平均線啊，建
行（００９３９）都一樣唔見近２巴仙，而中行就無咁傷，但都跟市軟１巴仙，分別收報
８﹒１６銀同４﹒２銀。
大象（００００５）同埋小象（０００１１）今日一齊除淨，當然少不免要腳軟喇，齊齊跌
低約半個巴仙，分別收報７７銀及１９５﹒９銀。
＊２４１報喜開心坐飛機，醫思泊ＱＱ有貨贏到笑＊
講完咁多位重磅藍戰，其實今日個別魚毛都非常有鑊氣，齊齊入晒五十大成交榜添。先講阿
里健康（００２４１），宣布舊年蝕少一半，至到約１億人仔，如果調整後，仲賺８００萬人仔
添！等咗咁耐終於有起色，阿里健康以成交大拿拿近１１億銀，股價飛升逾２６巴仙收５﹒６銀
。
仲有，香港醫思（０２１３８）泊到ＱＱ大碼頭，宣布同佢旗下企鵝醫生合作，引入香江醫
療孖屐。公司常務總裁李嘉豪仲放風聲，話唔排除同企鵝醫生喺股權上有進一步合作添。憧憬無
限，今日當然升到唔識停，火箭式爆升近６２巴仙報６銀！仲有恆大健康（００７０８）都叨光
炒埋一份，無消息下炒高逾９巴仙報４﹒２８銀。
民眾金融（００２７９）過去１１個交易日，被瘋狂洗倉，股價蒸發咗九成，公司終於出通
告，話唔知點解會暴跌，但強調目前財務及運營一切正常。等咗咁耐先肯出嚟派定心丸，缸友都
唔係好受落，結果今朝反彈最多４１巴仙後，埋單前縮到得番近１４巴仙報０﹒１４２銀咋，成
交都高達６億銀。
＊賭牌新消息賭佬好招積，５Ｇ再炒起聯通好歡喜＊
濠賭佬跑出，馬交嘅賭牌陸續喺２０２０年至２０２２年到期，馬交博監局就表示，正係到
積極檢討賭牌重新競投機制，預期短期內會有相關消息公布。金沙（０１９２８）衝前近２巴仙
，報４６﹒８５銀；永利馬交（０１１２８）彈起逾１巴仙，報２９﹒２銀，但銀娛
（０００２７）就要碌低０﹒１５巴仙，報６７﹒０５銀。
神州工信部話要加快推進５Ｇ技術產業發展，仲話要推動形成全球統一５Ｇ標準，並且加快
釋放網絡提速降費紅利，聯通（００７６２）噚日炒完鐵塔公司消息之後，今日再彈高逾１巴仙
，報１１﹒３２銀。
＊ＣＥＯ增持美圖威返次，免稅項再縮比亞迪木獨＊
美圖（０１３５７）有ＣＥＯ兼執董吳澤源增持１２８萬股，合計涉資超過１０００萬，緊
係信心保證喇，刺激呢條魚毛開心飛起近３巴仙，埋單報８﹒６５銀。街坊金蝶
（００２６８），先前就公布同祖國長城訂立戰略合作協議，最勁揪都彈高過近４巴仙，不過可
惜好快就無力縮哂水，埋單跌０﹒３５巴仙，報８﹒５６銀。
砵砵車是日都幾多消息，阿爺擬從《免徵車輛購置稅的新能源汽車車型目錄》撤銷合共
３１９款車型，意味住可能無法子再享有免稅優惠，比亞迪（０１２１１）跌低２巴仙，報
５２﹒７銀。
本田悉售本田中國權益畀廣汽本田，即係廣汽（０２２３８）嘅合資公司，但廣汽都要跟住
兄弟碌低逾３巴仙，報１４﹒１銀，國貨佬包尾，慘。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
