即市新聞

14/08/2018 17:31

《小傳日記》魚缸哭痛十個月低,科網散水QQ閉翳!

  《小傳日記》香江魚缸上個禮拜扭轉頹勢反彈690點,但原來只係技術性反彈,花旗國一
哥侵侵(特朗普)就失驚無神話要對火雞國(土耳其)徵收鋼材關稅,火雞國銀紙里拉即時高台
跳水。由於實在太有重量,加上美金又再走強,美匯仲要衝破埋96關,其他新興貨幣都一齊搭
沉船,包括埋人仔,搞到唔少好友心灰意冷。
  魚缸喺噚日(13日)唔見咗430點後,今朝(14日)只係係咁意高開1點咁大把,跟
住魚缸入面一班科技佬今日全日碌地沙,到咗下晝仲愈碌愈勁,QQ(00700)最多唔見咗
超過5巴仙,手機設備孖寶更加喺一眾藍戰士入面墊底,魚缸最多冇咗413點,低見
27522點,再創咗10個月新低。不過,好彩喺低位附近有勇士入嚟撈底,祖國移動
(00941)、AIA(01299)、大象(00005)同埋長江1號(00001)頂
住嗰市,最後全日埋單唔見咗183點或近1巴仙,報27752點。
  全日成交終於重上千億銀,有1024億銀,較噚日多咗23巴仙。國貨方面就唔見22點
,報10744點。A場腳唔見咗4點,報2780點。

*中期成績爛舜宇陷苦難,金軟碌地沙QQ眼花花*

  神州手機鏡頭一哥舜宇(02382)喺噚日魚缸收工之後放榜,但上半年只係賺多咗近2
巴仙,至11﹒8億人仔,低過「孖屐」預期嘅15﹒2億人仔。再加上早排公布嘅鏡頭出貨量
按月計喺錄得跌幅,缸友見到咁嘅業績當堂打咗個冷震,今朝競價時段已經急插超過17巴仙,
下晝仲最多唔見咗超過28巴仙,失守90蚊兼低見86﹒6銀,創超過一年新低,埋單計就跌
咗超過24巴仙,報91﹒9銀,仲要喺表現最差魚毛,認真嚇死人。跟蘋果搵食嘅瑞聲
(02018)都受襲,碌低超過7巴仙,報85﹒75銀,仲要喺超過一年低位84﹒2銀插
旗。 
  其他科技佬都冇乜運行,金軟(03888)發盈警話,預計全年會冇錢賺兼蝕錢,呢個震
撼彈搞到股價插咗近19巴仙,報13﹒18銀,兼喺超過5年低位12﹒66銀插旗。閱文
(00772)公布咗最新成績表,上半年雖然賺多咗1﹒4倍,但閱文好豪爽使155億銀同
阿媽QQ買起影視製作業務,缸友覺得閱文呢單「刁」唔抵,所以掟貨發洩,全日大插17巴仙
,報55﹒6銀。
  至於QQ,佢將會喺聽日收市後公布業績,但缸友擺明唔睇好佢業績表現,今日同其他科技
佬搭沉船大插超過3巴仙,報348﹒6銀,傷!
  孖屐係呾尋低,醒目資金起勢搶買「公用三寶」,中電(00002)電力十足,升3巴仙
報93﹒2銀,為最好表現嘅藍戰士;港燈(02638)都有1巴仙落袋,收7﹒78銀;
煤氣(00003)升1﹒5巴仙報16﹒18銀。

*神州教育佬澄清無煩惱,睿見不再顫股價坐火箭*

  話說神州教育佬噚日因為阿爺唔畀佢哋搞併購去賺多D錢,所以全線頭耷耷,但佢哋有幾位
街坊出嚟澄清之後,股價即時重見天日,其中,睿見(06068)表示阿爺呢一次舉措對佢不
痕不癢,缸友聽到之後顯得十分受落,收市坐火箭咁升咗16巴仙,收4﹒78銀;楓葉教育
(01317)今朝曾經跪低見4﹒3銀,不過最後都叻豬跳起逾4巴仙,報4﹒68銀;新高
教(02001)同埋宇華教育(06169)孖住抬返起頭做人,齊齊開心報喜,跳高近
11巴仙同逾9巴仙,報5﹒2銀同埋報3﹒71銀;民生教育(01569)亦好識做,畀一
眾缸友捧起飛逾6巴仙報1﹒33銀。
 
*獲大和祝福李寧唔駛縮,天虹續擴充股價起勢衝*

  獲得匯證維持「買入」評級,兼獲大和由9蚊升上10蚊「他屐」嘅李寧(02331),
今日股價就威威豬啦!曾經一度上到9﹒14銀,不過後勁乏力,最後收市只有逾1巴仙淨低喺
荷包,報8﹒6銀;神州波鞋一哥安踏(02020)派咗成績表,雖然賺多咗34巴仙又有中
期息50港仙,今朝仲一度炒高近半成兼高見42﹒5銀,但之後有唔少缸友食胡散水,全日埋
單計畀人質低一成,報36﹒5銀;浩沙(02200)就澄清早排被沽空機構話佢收入有水份
嘅指控,公司董事會話將會為此指控進行審查,唔知係唔係因為缸友們覺得佢好有男子氣概呢,
所以起勢咁掃貨支持佢,全日彈起近37巴仙,報0﹒355銀。
  天虹(02678)又獲大和升「他屐」,由16﹒5銀升到去17蚊,買入建議維持唔變
,其實天虹佢都好勤力,話未來會繼續擴充產能,預計會增加3至4億人仔,聽到佢咁有上進心
,缸友都好支持佢,全日走高逾3巴仙,報13﹒58銀;申洲(02313)終於成功染藍,
噚日仲差D再上紅底,但今日缸友就同佢分手搞到無晒心機,全日收市唔見咗近4巴仙,報
93﹒1銀。

*抽水拖後腿光國急散水,建成受寵愛氣勢不容蓋*

  神州垃圾發電一哥光大國際(00257)今日下晝突然公布要向缸友抽水,建議27供
10,每股供股價6蚊,聽到要畀人抽水仲唔走夾唔唞咩,即使獲得大摩同瑞信維持「他屐」,
午後仍然高台跳水,全日直插水逾21巴仙報6﹒9銀;四環醫藥(00460)噚日表示研發
咗抗腫瘤專利藥「羅替尼」,而家仲正式進入第二期嘅臨床試驗階段添,呢個消息一出,果然係
勢不可擋,一次過升破晒十天(1﹒593銀),廿天(1﹒597銀),同五十天線
(1﹒732銀,全日嘻嘻哈哈又袋14巴仙,報1﹒78銀;建成(01630)連升5日累
漲近2倍,愈升愈有,今日最高見0﹒88銀,全日都備受寵愛,全日收升13巴仙,報
0﹒78銀。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新節目《說說心理話》原生家庭對成長有咩影響?改善溝通有計可施?► 即睇

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力