《小傳日記》呢期都幾多新股上市，譬如今日又有隻普樂師（０２４８６）敲鑼，不過呢隻
新股表現就非常之曳，破發不特止，仲要比起１０﹒４銀嘅下限再大跌差唔多兩成半，以今日收
市價７﹒９９銀計，每手２００股帳面要蝕５２２銀！
據普樂師官網介紹，普樂師係神州銷售同營銷服務嘅供應商，會為線下零售店（例如超市、
百貨公司同戶外促銷活動等）擔當快速消費品品牌商同經銷商，提供實地銷售同營銷解決方案，
主要提供四大服務，包括：（１）定制營銷解決方案；（２）任務與營銷人員匹配服務；（３）
營銷人員派駐服務；及（４）ＳａａＳ＋訂閱。
簡單嚟講其實就係有負責做ＳａａＳ嘅Ｍａｒｋｅｔｉｎｇ公司，可以想像係一間會幫零售
商品做宣傳嘅公司，當中包括派ｐｒｏｍｏｔｅｒ喺唔同實體地方做宣傳，從ＩＰＯ資料可以見
到應該主要要幫日常護理用品做宣傳。截至２０２２年底，普樂師嘅第三大客戶，據招股書描述
就有可能係Ｐ＆Ｇ，而呢間公司都已經連續幫襯普樂師多年，２０２２年就貢獻咗超過８０００
萬人仔收入。
如果以概念股嚟劃分，普樂師係供應鏈最下游供應商，亦都同零售市道息息相關，可以話係
內需概念股之一，市道好，零售商肯畀錢加大宣傳就有利生意，炒概念就應該係跟內需板塊。不
過零售市道波動，做宣傳都有好多方法，唔一定要搵普樂師。所以就睇客戶忠誠度，普樂師公布
咗２０２０年度至２０２２年度嘅五大客戶，疑似Ｐ＆Ｇ都最少連續三年係五大客戶之一，不過
貢獻收入都偏向穩定，三年分別係７１１９萬、８１２４萬同８０３２萬人仔，好難會忽然加大
宣傳，未來好睇仲會傾到幾多大客先有望提升收入，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
etnet榮獲HKEX Awards 2023 「最佳表現證券數據供應商」大獎► 了解詳情
