《笑傲缸湖》「飛天蠄蟧」身手敏捷、無所不能，真係鬆懈一分鐘都隨時畀位佢哋入。窮如
盈盈出街會鎖實門窗，富貴人家就自然請多幾個保安，但始終難保百分百安全。
噚晚（１１日）山頂中峽道１９號大班屋就畀人爆竊，戶主原來係「獅王」匯豐亞太區行政
總裁王冬勝。保安９點幾巡過花園，見到戴口罩嘅可疑男子，報警亦已經太遲。點算之後，發現
損失咗一批首飾同８隻手錶，價值２４５萬，但錢財事小最緊要人冇事，王冬勝同家人都幸告無
恙。警方翻查閉路電視，就指嗰４個賊仔係由山坡爬過外牆潛入，經２樓窗戶入屋爆竊。
盈盈得閒無事嚟個大起底，間大班屋實用面積有成８９００方呎，市值高達５億，路口兩旁
各有一隻獅頭雕塑，咁有氣派，引到班膽大包天嘅賊仔流哂口水。又話說，原本間屋係留畀匯控
ＣＥＯ歐智華住嘅，只係佢成日飛唔多返香江，先讓畀王冬勝，真係唔知邊個好彩邊個運滯囉！
盈盈係度又幫警方呼籲一吓，缸友記住要打醒十二分精神，小心駛得萬年船，唔係辛辛苦苦
搵埋益咗賊仔就唔好啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
