即市新聞

15/05/2019 11:58

《魚缸博客》潤啤獲納入國貨指數短期仍有水位,上望37銀

  《魚缸博客》上星期五(10日)恆指公司公布季檢,恆指成分股不變,但國貨成分股就「
五出五入」,當中最新加入嘅潤啤(00291)其實都值得留意,除咗因為又係華潤系成員有
保證之外,喜力喺香江嘅業務已經畀潤啤買晒,所以佢已經唔係一個神州品牌咁簡單。
  潤啤同喜力嘅關係需要講返去2018年,當時潤啤阿媽華潤集團(啤酒)以243﹒5億
港紙配售新股畀喜力,之後阿媽嘅股東華潤創業又用4﹒64億歐元買咗喜力520萬庫藏股,
可以話係幫潤啤呢個阿仔鋪路。潤啤之後可以喺神州、香江、馬交獨家使用喜力商標,年尾11
月潤啤更用近23﹒55億港紙收購喜力喺神州、香江嘅所有股份。
  點解博客要咁強調佢哋嘅關係?因為高盛今個月嘅研究報告都話,基於喜力業務計入潤啤嘅
預測成績表,所以上調佢2019至2021年度嘅經常性每股盈利預測4至13巴仙。高盛都
解釋,同喜力合併有助潤啤拓展高端啤酒嘅「孖屐」,估計喜力2021年前佔有率可以有9巴
仙,所以博客先咁睇好呢個「屋企有華潤,出外有喜力」嘅啤酒佬。
  除此之外,當然仲有其他好消息,博客先會叫缸友掃貨啦!大摩最新一份研究報告話,潤啤
成為國貨指數成分佬之後,估算會額外帶嚟9700萬美金嘅被動資金流,所以繼續睇好畀掃貨
評級,「他屐」37銀。
  另外,潤啤今年成績可能會有大驚喜,上年全年純利9﹒77億人仔,但花旗、高盛、大摩
都估佢今年可以賺19﹒96至33﹒18億人仔不等,都接近有兩至三倍,所以基本因素缸友
們都真係唔需要太擔心。
  操作方面,因為季檢嘅變動下個月17日先生效,所以缸友們仲有接近四星期時間部署,當
然建議低位吸納,不過近期神州花旗講數情況唔明朗,股價可能隨市有啲波動,不過近33銀水
平就可以吸納,上望今個月高位37銀。至於支持位就睇返250天線近31﹒85銀水平。

  《編者按》本欄搜羅即市傳聞,惟消息未經證實,《經濟通》亦不保證內容之準確性。

「港元定存息率」大比拼 食息都要食得醒 https://goo.gl/i9KA4Y
人氣文章
財經新聞
評論
專題
產品簡介

【etnet x 樂本健 父親節窩心Bonus】即Like即送 維柏健[男士綜合維他命礦物質] (價值HK$312)

【得獎名單】「我最喜愛的社企計劃」全民投票

【etnet Bonus賞你】信德中心x皮忠【Let Love Blossom森愛•花見】限量文創禮品