即市新聞

29/11/2019 11:58

《魚缸博客》中俄天然氣管道下月正式供氣,昆能估值殘可作首選!

  《魚缸博客》自從侵侵(特朗普)喺感恩節假期前終於簽咗《香港人權與民主法案》,花旗
國同神州原定今個星期嘅貿易談判已經搞唔成,而侵侵呢一著更令兩國關係轉差,貿易談判更加
唔知幾時先搞得成。喺呢個壞消息不斷發酵下,加上人行已經連續8日停止逆回購,缸友搵到藉
口掟內銀,沽壓亦都慢慢蔓延至其他板塊,搞到魚缸單單半日就蒸發咗超過500點,再次失守
50天線(26633點)。
  嚟緊12月,隨住基金會有粉飾櫥窗活動,魚缸應該跌極都有個譜,加上某啲板塊仍會有炒
作概念,相信都可以博一博。踏入冬天,唔駛多講神州唔少地區都要使用唔少取暖設施,以往華
北唔少地區都係燒煤取暖,搞到每年呢個時候都霧霾四起,隨住中央大搞環保,幾乎所有村落都
要轉做使用天然氣嚟取暖,所以一眾燃氣佬到咗呢個時候係最多生意做。
  部分燃氣佬喺十月開始已經偷步炒作,龍頭之一嘅昆侖能源(00135)就喺十月中築咗
雙底後反彈,即係由當月嘅低位6﹒3銀開始跳彈床,喺今個月頭最高曾去到7﹒78銀,累積
升幅超過兩成三,之後就上演高台跳水嘅戲碼,今日半日就最低見過6﹒58銀,相信去到
6﹒3銀會有d支持,並有望形成三底形態,缸友不妨吼實等佢回落至該低位吸納。
  事實上,以估值嚟比較,昆能一直落後其他街坊,今年預測市盈率只有7﹒7倍,而潤燃(
01193)、中燃(00384)同新奧能源(02688)閒閒地都有十倍以上,以行業龍
頭,昆能估值的確係相當吸引。另外,中俄天然氣管道已經喺今年十月中旬全線貫通,下個月起
有望為神州供氣700萬立方米,而昆能喺黑龍江有唔少業務,而該條管道第一站就係經過黑龍
江,通氣後該區有望率先受惠。
  
  《編者按》本欄搜羅即市傳聞,惟消息未經證實,《經濟通》亦不保證內容之準確性。

新型肺炎專輯 - 最新疫情發展和防疫貼士即睇

人氣文章
財經新聞
評論
專題
產品簡介

用經濟通App睇實股價 一按買入/賣出直達銀行或券商App落盤

【etnet一App通天下】獨家「銀行匯率比較」功能 匯市靚價一眼通 一按直達交易商

【Keep住更新】口罩供應 - Ones專業禮品訂製公司接受口罩訂購