RSS訂閱 自從鐵道部變成中鐵總公司之後，之前長時間無咩進展嘅鐵路建設又重新啟動，不過就算改咗名，中鐵總公司仲揹住成身債，正所謂長貧難顧，國務院都要諗諗計，等鐵路工程長遠可以自給自足唔使下下問阿爺科水。最新就公布一系列融資改革，當中包括以地養鐵模式，即係好似香江港鐵（０００６６）咁，可以發展鐵路沿線土地，見到港鐵咁好賺，就知呢條路絕對正確！
當中咁多隻鐵路股份，中國中鐵（００３９０）就最受惠，睇返公司嚿年業績，雖然房地產開發營業額佔整體營業額只係４％咁大把，但係以溢利計，竟然可以擔起公司總溢利高達３３％之多，好明顯房產開發相對於中鐵其他業務，絕對係一嚿肥豬肉。
中鐵同中國鐵路總公司雖然並無任何血緣，不過點樣計落，中鐵總都係大奶媽，兩者係有種切肉不離皮嘅感覺。中鐵總有地要起樓，中鐵點都會被關照，未來更有可能見到中鐵嘅房地產盈利貢獻會高過「揼石仔」起鐵路，成為祖國港鐵！
中鐵年頭見過４﹒９１５銀高位，博客然為好大機會可以突破，重見５蚊關口，止蝕定低少少去到４蚊都唔怕。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
