RSS訂閱 四環（００４６０）公布大考成績，全年賺１３億人仔，大升４４％，勝孖屐預期嘅１２億人仔。雖然佢唔及上年咁豪爽，最尾一期派息不及去年，但幸好佢識發紅股冧股東，睇佢今日（１１日）股價一度炒高一成有多，睇嚟孖屐相當受落。
喺佢盤數中，毛利率增加３個百分點可謂又一亮點，亦揭示出做藥「輸前贏後」嘅特點，即係研發階段勁揼水，到產品推出孖屐就慢慢賺，亦因陸續收本，油水愈嚟愈高添。摩通大讚佢成績靚仔，仲指佢有６種獨家藥品，有望喺嚟緊嘅招標中受惠，若嚟緊日子果真好似四環預計行業增長續加快，好日子可望繼續嚟。
睇睇四環個圖，股價升足兩年，足足「翻四番」，但喺今早再度破頂、突破十蚊關口後，升幅隨即收窄。唔係話四環炒完，只係現價鑊氣太濃，搶到貨，短炒都食之無味。若諗住揸長線，則可考慮喺８蚊、７蚊及６蚊位分段入注，逢低即吸。
《編者按》本欄搜羅即市傳聞，惟消息未經証實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
