RSS訂閱 花旗揸ｆｉｔ人「侵侵」將會喺幾個星期內，就稅制改革政策發表重大聲明，憧憬經濟進一步轉強，花旗三大魚缸噚晚（９日）創收市新高，道指收升１１８點報２０１７２點。香江魚缸今朝跟勢衝高１２０點，最高見２３７１８添。最緊要係，呢幾日成交明顯急增，今日上半場差唔多完，已經有超過４７０億銀，睇嚟「金雞」想挑戰二萬四關喎！
富智康（０２０３８）噚日收市後更新盈利預測，即獲大摩同瑞信分別調高目標價至３銀及３﹒３銀，幅度高達逾３０巴仙及１８巴仙，刺激股價今朝曾跳高逾１１巴仙至２﹒９４銀。不過睇番最新通告指，公司喺１０月初估計全年盈利少過１﹒１億美金，但經過再評估後，依家應該賺１﹒３５億美金至１﹒４５億美金左右，按年跌３７巴仙至４１巴仙，換言之，即係比上次預測多咗２５００萬美金至３５００萬美金。
而咁啱公司通告底部，提及喺舊年７月至１２月期間錄得３６５７萬美金嘅重大外匯收益。呢Ｄ一次性嘅收益，並唔係時時都咁好彩。究竟公司收入係咪真的大幅改善，依家下定論都言之尚早，缸友都係勿心急高追喇！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
