RSS訂閱 香江魚缸已經突破二萬四大關，創５個月新高，成交額亦上升久違了嘅千億水平，生發發（００３８８）當然係受惠之一。上星期五（９日）先向缸友推介過，指水頭充足，生發發可以炒上２１０銀，估唔到今日（１６日）已最高見２０４銀，距離目標愈嚟愈近喇。
「北水」威力絕不可睇少，依家魚缸成交已經去到６３０億銀，已多過悶市時全日嘅成交。除咗生發發外，惠理（００８０６）都係旺市中唔錯選擇。公司舊年上半年，因為魚缸反覆無方向，純利激減近９９巴仙至５０２萬銀，差ＤＤ就「見紅」；但自７月份開始，魚缸下半年已累漲約１２００點或６巴仙；而近呢兩個月，更係扶搖直上，突破二萬四大關！對惠理來講，絕對係一支好大嘅強心針。
加上噚日又獲大摩「欽點」，畀「加碼」評級，目標價上望８﹒７銀，就算以今日７﹒８銀最高位計，都仲有逾１１巴仙水位。缸友想短炒番轉，可以等回番去約７﹒５銀左右上車。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
