RSS訂閱 金沙中國（０１９２８）遇著大市整固回吐，今早（１７日）跌近２巴仙。該股喺今日將派去年度業績表，據上個月母企金沙集團業績，連帶公布囝囝金沙中國第四季度成績，季內只賺３﹒４８億美金跌７﹒９巴仙，經調整物業ＥＢＩＴＤＡ只有６﹒１億美金差過孖屐預期；而全年計只賺１２﹒２億美元減少１５﹒９巴仙。金沙集團當時話，馬交業務行衰運，其中一個原因係有個女客人喺旗下賭場持續贏錢，睇下今日公布完整業績時會唔會多加解釋；當然，亦應該為上任只有４個月嘅財務總監突然離職解下話。
「賭后」起勢贏錢，高層掌櫃突破離職，暫時睇只係「個別事件」，唔影響業務大局。事實上，馬交賭收已回復增長，大行亦估計復甦速度加快，故此，濠賭股應該再度亦投資考慮板塊之列。惠譽日前預期馬交今年賭收有中至高單位數增長，其中高端業務趨穩。
睇返金沙個公仔圖，或要試穿３２蚊，甚或再試３１銀至３１﹒５銀，建議缸友可以喺呢個水平吸納博反彈，只要整體馬交賭收數據如預期好轉，金沙博上３５銀、３６銀亦好ｅａｓｙ。
魚缸近期大成交配合後升上二萬四，好多落後大隻佬股都已經追升，金沙暫時係今年以來最差表現嘅大隻佬股，無理由唔跟市升，就算唔跟多亦會跟少，同時無理由落後同業咁多！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
