RSS訂閱 自從花旗國聯儲局宣布加息四分一厘，並表明循序漸進加息，魚缸又去除咗一大隱憂，而荷蘭大選方面，執政黨自由民主人民黨料保最大黨之位，又令孖屐鎮定落嚟。暫時魚缸升幅雖然無噚日（１６日）咁多，不過後市仍然看好。而當中，屬於大股中嘅大股，股王ＱＱ（００７００）更加喺朝早就破頂啦！
噚日ＱＱ市值已經破兩萬億銀，今朝更加高見２２２﹒８銀見上市新高。以往公布業績之前，大部分情況ＱＱ都會偷步炒起先，升幅一般大約３個巴仙。好似喺２０１６年３月、５月、８月時，ＱＱ３月嗰陣業績前５日錄得近７巴仙升幅，而５月同８月時期就錄近３巴仙升幅。大行花旗、野村分別都唱好ＱＱ股價，目標價分別為２６２銀同２５２銀。觀乎科網股嘅表現，近來都有唔少資金追逐，就好似美圖（０１３５７）咁，今年累計漲近八成！所以短線嚟講，ＱＱ都係一隻唔錯嘅股份，值博率甚高！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
