荷里活電影《狂野時速》集集新鮮集集精彩,雖然主角之一的Paul
Walker已蒙主寵召,由第七集起已經唔會再見唔到,但睇住班大隻佬揸住架車橫衝直撞真係相當過癮,最新一集仲要整多個3﹒2萬磅嘅大鐵球去撞爛晒D車,劇情緊湊得嚟又相當驚險,個個觀眾都睇到眼仔look look,咁又難怪佢嘅全球票房已經大嗱嗱有近9億美金,認真巴閉。
神州依家話晒都有成十幾億人,佢哋真喺一人一年只睇一套戲,票房已經係天文數字。荷里活唔少電影都係大製作,唔食住神州條水賺人仔,點可以同投資者交代。《狂野時速8》單係上畫頭三日已經勁收近13億人仔,到依家已經起咗個Double,坐底有20億人仔以上。
係香缸上市嘅電影公司唔喺好多,最有卡士嘅就應該喺IMAX中國(01970)。只不過呢隻魚仔係2015年10月入魚缸之後兩個月一度升至60銀,高招股價31銀差唔多一倍,之後瀡滑梯瀡到今年年頭31﹒1銀,依家個價位都只不過係唔夠36銀。荷里活係今年嚟緊仲會上蜘蛛俠同變形金剛,呢兩套大製作係神州不嬲都幾賣得,加上《狂野時速8》票房咁勁,唔少大行都好樂觀咁話第二季票房會跳彈床,刺激IMAX短線收入上升,依家IMAX個價都算幾殘,反彈水位都可以睇高一線。
《編者按》本欄搜羅即市傳聞,惟消息未經證實,《經濟通》亦不保證內容之準確性。
WoW WoW星期三:健康網購產品低至$99 (只限今天)► 立即行動