RSS訂閱 法蘭西總統大選第一輪結果令孖屐鬆一口氣，加上憧憬「侵侵」星期三會公布大規模減稅計劃，德國魚缸、花旗國納指齊齊創新高。香江呢邊都受帶挈，今朝（２５日）升過近３００點越２４４００水平，收復埋廿天線（約２４２０８點），如果之後守得穩，後市應該會樂觀返Ｄ。
ＡＳＭ（００５２２）控股股東ＡＳＭＩ配售２０００萬股，即約４﹒９巴仙股權，配售價１０５元，較前收市價折讓８﹒５巴仙，共套現２１億銀。突然嚟個深水炸彈炸一炸，
ＡＳＭ朝早一度跌６巴仙。
不過，「賓架」花旗話唔感到意外，話ＡＳＭＩ喺４年前都減持過公司１２巴仙權益，六成半所得仲派返畀股東，非常豪爽，今次亦可以提升ＡＳＭ嘅自由流通量，長遠而言係正面嘅。
查實缸友唔洗太擔心，ＡＳＭ首季多賺４﹒５倍，新增訂單總額同收入創歷來第一季新高，更預料第二季收入按年有雙位數增長。麥格理就認為佢毛利仲有空間上升，瑞信都估計雙鏡頭、３Ｄ感應器會成為未來增長動力。
ＡＳＭ業務絕對有保證，可以趁佢回吐至１０７銀整固區低吸，中長線再續破頂之旅！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
