魚缸今個禮拜頭三日都好氣勢如虹,升咗536點,但今日魚缸終於見紅,突然跑得咁急點都要回一回氣,好彩嘅喺跌幅隨著時間收窄,魚缸半日都只係跣低咗唔夠10點。
魚缸呢排係威係勢,加上祖國魚缸呆呆滯滯,上面嘅缸友都多咗落嚟香缸炒番轉,QQ
(00700)仲要連日破頂,認真巴閉。不過,有謹慎嘅缸友就話,雖然多咗祖國缸友落嚟餵魚,但係加加埋埋,每日成交都唔算高,仲未突破到800億銀,反映咗有唔少缸友都寧願睇定D先再諗吓落唔落場,加上下個禮拜就踏入五窮月,魚缸都未必可以枕住有得升。
佢哋話呢個moment,最好揀返D優質魚仔嚟養吓就最好,梳化達人敏華
(01999)就喺首選之一。花旗國係敏華嘅主場,幾日前公布嘅三月新屋銷售大嗱嗱有成
62﹒1萬間,按月升咗近6巴仙,仲要喺舊年7月以來最高,比預期嘅58﹒3間多。個邊嘅樓價升幅已經連續五個月都有所擴大,加上物價正慢慢升緊,花旗國經濟點都唔會差得去邊。
神州喺敏華嘅第二主場,除咗喺神州嘅舖頭愈開愈多之外,年年嘅銷售都枕住有雙位數升幅,呢排仲要話推出新牌子,前景都比唔少大行睇好。
業績固然喺敏華賣點,呢幾年派息都愈嚟愈闊佬,仲要送埋紅股,防守力自然唔話得。以噚日收市價計,今年以來升咗23巴仙,今年預測市盈率都只喺15﹒3倍,A場上市嘅街坊閒閒地都有廿幾倍以上,估值吸引,缸友都可以諗諗買呢隻優質魚仔嚟養吓。
《編者按》本欄搜羅即市傳聞,惟消息未經證實,《經濟通》亦不保證內容之準確性。
全新節目《說說心理話》青少年不可以戀愛!?真實個案講述驚心動魄經歷► 即睇