RSS訂閱 雖然話缸友預咗花旗國加息同縮表，但噚晚（１５日）道指標普齊齊向下，科技股再度走低拖累納指跌２９點。香江噚日急插３１０點，雖然今日（１６日）略高開３６點，但開市冇耐上到半日高位２５７１９後就回落，依家仲係廿天線（約２５７１７）樓下。
莎莎（００１７８）年度盈利跌近１５巴仙被大行唱淡，相反同行歐舒丹（００９７３）去年度盈利增近兩成，就勝在善用網上平台，上年國內銷售升兩成，上個月仲揾埋紅遍內地嘅鹿含做代言人，借微博同微信宣傳添！高招一出，大和都睇好維持佢「優於大市」評級，目標價仲由１７銀升到１７﹒５銀。
睇番公仔圖，歐舒丹最近見升，突破１６銀後，進一步遠離十天線嘅牽引，噚日仲升到一個月新高１６﹒２２銀，個勢的確係強，而且公司仲喺星期二（１３日）同星期三（１４日）斥資１７６８萬銀回購添。
公司出年仲有４款新產品推出，依家諗緊點樣翻新門面再出力吸客。呢種遠見對佢長期業務增長力有一定幫助，仲要受神州客長期捧場。市場潛力大，大家不妨買多少長揸唔好輸蝕啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
