RSS訂閱 Ａ場第四次挑戰入摩終於都報捷，雖然缸友望到頸都長埋，但噚晚（２０日）花旗國魚缸又跌過，油價更加係一直潛水，香江魚缸對Ａ場入摩消息冇乜反應之餘，朝早仲要跣低最多２６７點，Ａ場嗰邊更加係冇乜點郁過，之後標普仲走出嚟「贈慶」，話諗住降神州評級。
神州眾多行業入面，除咗科技值得留意外，環保行業同樣都可以望多幾眼，事關神州近年發展都好似坐緊火箭，連污染問題都坐埋順風車，所以阿爺近年好堅定話要大搞潔淨能源，加上而家所謂嘅清潔能源佔能源使用比例仍然相當低，即係話環保行業前景可以話係有幾遠睇幾遠。
神州作為風電大國，加上阿爺力撐，理應前景靚仔。而家香江魚缸入面嘅風電佬估值相當低，平均預測ＰＥ都唔超過１０倍，要炒落後真係有得諗，當然首先就睇吓啲大佬級嘅風電佬啦。
華能新能源（００９５８）今年預測ＰＥ平通街，都係得６﹒２倍，街坊金風科技
（０２２０８）（深：００２２０２）同中國高速傳動（００６５８）有成７﹒７倍同９﹒９倍，股價由今年三月尾高位２﹒８８銀一直喺咁碌落嚟，今日暫時最高見２﹒３６銀。另外，華能成績向來都靚仔，舊年賺多超過四成，加上今年發電量一直保持增長，缸友都好樂觀估佢上半年成績一樣冇走雞。今日交銀國際都出嚟撐華能，話佢估值明顯偏低，亦都預期盈利能力會繼續提高，維持買入評級，「他屐」３﹒３４銀。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
