RSS訂閱 Ａ股終於成功加入ＭＳＣＩ大家庭，但魚缸噚日（２１日）都要瞓低上百點失守埋廿天線。６月份孖屐最期待嘅好消息都淡淡而過，今朝（２２日）魚缸頓時冇咩方向，睇怕６月最後個幾星期都仲會繼續喺２５５００至２６０００徘徊。
火電股再次成為話題板塊，有傳阿爺有新通知，７月１日起取消向發電企業徵收工業企業結構調整專項資金，國家重大水利工程建設基金、大中型水庫移民後期扶持基金徵收標準亦一率降低２５巴仙，簡單嚟講即係變相提高上網電價。
有分析話，新措施唔會影響下游用電成本，可以由量、價兩大方面改善火電企業嘅盈利水平。花旗更指，如果新政策落實，等同上調上網電價３﹒７巴仙，發電商未來兩年就會多賺
２６至２８巴仙！
連同之前傳出阿爺想將神州主要火電、核電企業合併重組為３家，火電股可以話係受到重點照顧。今朝有關板塊股份走高１至４巴仙不等，但好似潤電（００８３６）、華電國際
（０１０７１）已經上到５月尾６月頭嘅阻力位，大唐發電（００９９１）走勢相對較落後，若有實質政策細節出台，大唐有力再上試３銀。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
