RSS訂閱 神州錢莊佬呢兩日都撐起咗個魚缸，雖然佢哋老奉唔派中期息，盈利表現又冇乜睇頭，但呢幾日大行不斷有報告話，神州錢莊嘅四位大佬上半年利潤增速會令「孖屐」眼前一亮，加上佢地嘅資產質素持續有改善。再加上估值平通街，對比Ａ場股份都有折讓，睇嚟神州錢莊佬喺放榜前都仲有得落鑊。
睇返其他股份，神州資源佬近排都好巴閉，前排Ｄ金屬佬升咗一排都開始見腳軟，而今日就到紙業佬接棒，兩大龍頭玖紙（０２６８９）同理紙（０２３１４）同領漲街坊。老老竇竇，神州紙業已經開始走出谷底，證明咗阿爺去產能政策相當有效。玖紙今年以嚟股價表現就最省鏡，升咗超過７５巴仙；而理紙只係升咗超過３７巴仙，足足跑輸玖紙幾條街。
論產能規模，雖然理紙喺神州紙業界只能屈居玖紙後面，但講到賺錢能力，理紙絕對冇得輸，舊年賺接近２９億港紙，而玖紙去年度只係賺咗超過１１億人仔。再加上前幾年神州紙業比較頹嘅時候，理紙盈利增長都相當穩定，幾乎年年都賺多咗錢。相反，玖紙盈利表現則波動Ｄ，槓桿都比理紙高，負債率都偏高。
理紙早排發咗盈喜，話上半年起碼多賺五成，而理紙下個禮拜一（２１日）就會放榜，若果增長較預期高，相信都可以繼續炒上。理紙今年預測市盈率１０﹒２倍，玖紙就有１２﹒７６倍，走勢同估值都喺後面食塵，加上理紙搞埋紙巾業務，人仔穩定返更可以降低進口廢紙成本，未來有望支撐估值向上，不妨作為紙業街坊嘅首選。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
