RSS訂閱 花旗國魚缸噚晚（１６日）造好，三大指數齊齊破頂，本地魚缸今朝（１７日）都跟住高開８４點，但之後生發發（００３８８）腳軟軟限制魚缸表現，上畫魚缸只能窄幅上落。
美銀美林預期中通服（００５５２）將會成為祖國其中一個主要服務供應商，為內地電訊商提供網路建設服務，首予「買貨」評級同埋目標價５﹒６銀，仲讚佢毛利率穩定，過往回饋股東方面有良好Ｒｅｃｏｒｄ添！
咁啱內地有報道話京津冀協同發展專家諮詢委員會副組長鄔賀銓放風聲，話河北雄安新區好可能會成為祖國率先使用５Ｇ嘅地區，到２０２０年祖國要實現商用５Ｇ。中共十九大聽日
（１８日）就開波，若果會議真係有５Ｇ消息，相信５Ｇ概念股將會隨即開車，之前都幾炒得嘅中通服相信係個唔錯嘅選擇。
睇番公仔圖，中通服呢排炒起咗，之後雖然見回吐，但之後見到有支持，一於會議前買番多少中通服！若果缸友本身已經有貨，建議揸到會議之後先，分分鐘可以食多一浸，上望５蚊。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
