RSS訂閱 有人話「逢７字尾嘅年份就股災」，而聽日就係１９８７年１０月１９日「黑色星期一」３０周年，當日香江股市承接花旗國道指上日下跌４﹒６巴仙之勢，全日急挫１１巴仙，隔晚道指再挫５０８點或２３巴仙，觸發全世界魚缸暴瀉，香江呢邊之後更加停賽四日，復市之時（１９８７年１０月２６日）更加暴插１１２０點或三成三，真係觸目驚心。
時至今日，世界已經唔同晒，金融孖屐監管亦嚴密咗，究竟２０１７年會唔會歷史重演呢？查實，當年香江同花旗國喺股災之前都升咗唔少，睇返數據，花旗魚缸由１９８５年及１９８６年分別累漲近２８巴仙同近２３巴仙，１９８７年９月為止九個月再升近３７巴仙。至於香江方面，魚缸喺１９８５年漲４６巴仙，１９８６年升４７巴仙，１９８７年９月止三個季度升
５４巴仙。
時至近年，花旗魚缸由２０１５年到２０１７年１０月嘅升幅，係２６巴仙，而香江魚缸升幅係１７巴仙，兩個孖屐同１９８５年１９８７年時期相差甚遠。
再加上，依家聯邦基金利率係１至１﹒２５厘水平，比當年低好多，環球處於「水源充足」嘅局面，各國之前量寬嘅後遺症仲未消化得晒。喺資金泛濫嘅大環境之下，資產價格就會上升，所以今年環球魚缸都造好。依家全世界比起２００７年金融海嘯之前更加注重系統性風險，大家都穩步前進，相信今年出現大風險嘅機會好微。
所以缸友暫時唔需要害怕有大股災，不過時刻做好風險管理，係投資應有嘅態度。以魚缸暫時仲係喺十天線（２８５０７點）之上行走嘅姿態睇，相信後市會慢慢挑戰２９０００點。然後又會再喺２９０００點度整固，有貨嘅缸友記得坐實唔好亂落車啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
