RSS訂閱 侵侵搞出嚟嘅貿易戰雖然暫時冷卻，但今個禮拜二（２０日）花旗國就舉行議息會議，禮拜四（２２日）香江時間凌晨就會有結果。今個月加息機率超過九成，「孖屐」估聯儲局都唔會臨尾轉軚，主要都係留意聯儲局對後市會有咩睇法。
講起其他板塊嘅表現，今年以嚟表現最標青嘅就一定非醫藥佬莫屬，皆因唔少醫藥佬業務好少受到外圍因素影響，而醫藥又屬於日常必需品，無論個魚缸點翻雲覆雨都好，有病始終都要食藥，股價自然有返咁上下防守力。
再者，神州近年持續大刀闊斧改革醫療制度同大搞生物科技，藥物品質提升之餘，醫藥佬嘅研發能力不斷增強，舊年至今就有幾隻醫藥佬，因為旗下新藥獲准可以進行臨床試驗或認證而炒高唔少。
另外，神州人口老化同中產搵多咗都推動高價藥物需求增長，花旗國嘅市場調查公司
ＩＱＶＩＡ統計，２０１６年神州醫藥品「孖屐」嘅規模約１１６７億美金，全球規模僅次於花旗國，預計到２０２１年，神州嘅醫藥「孖屐」規模將會大增近五成，至１７００億美金，所以醫藥佬都值得缸友長揸。
揀股方面，綠葉製藥（０２１８６）近排都有唔少好消息，繼上個月旗下治療精神分裂嘅新藥，獲得花旗國食品藥監局（ＦＤＡ）批准，唔需要進行任何兒科臨床試驗，即係話可以慳返唔少研發費用。之後，旗下用嚟治療柏金遜嘅新藥，獲得神州藥監局免除開展第二期臨床試驗，呢個消息一出街一度令到綠葉股價彈起唔少。
事實上，綠葉手頭上仲有唔少研發緊嘅項目，估計未來都會繼續會有唔少有關藥物研發進展嘅好消息，即係話未來會有唔少股價向上催化劑。走勢方面，綠葉喺上個月小股災下，一度由近兩年山頂位７﹒４銀回落至約６蚊左右水平，之後亦都隨大市反彈，喺低位整固完畢後回升，而今日（１９日）順利破埋７蚊關，綠葉喺下個禮拜一（２６日）放榜，相信可以持續吸引資金掃貨，短線先上望７﹒４銀。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
