RSS訂閱 臉書股價大跌，拖累花旗國三大指數隔晚（１９日）齊齊腳軟，道指挫３３５點，收報２４６１０點。香江呢邊今朝（２０日）都跟住無力，低開１９８點，之後都保持住喺十天線附近上落。
石藥（０１０９３）呢排走勢好厲害，經常都喺國貨佬頭幾位見到佢嘅蹤影，除咗因為醫藥股全線都受到缸友追捧之外，佢自己本身都ｋｅｅｐ住有唔少好消息支持，早前就有治療肌萎縮側索硬化症嘅新藥，獲花旗國藥監局認定，之後又有聯營開發藥物獲祖國嘅臨床試驗批件。
相信咁多位缸友最關注嘅，都係佢噚日中午公布嘅全年業績喇。結果當然係不負眾望咁靚仔，舊年全年就賺多咗近３２巴仙，仲有１５仙末期息派添。但噚日因為大市無咩方向，佢收市都只係升咗少少。
不過，今日就唔同啦，全因為有多間大行同券商爭住要升佢嘅「他屐」，瑞信將目標價由
２２銀升到上２４﹒５銀，評級維持「跑贏大市」；睇到最好就係大華繼顯，最新俾嘅「他屐」係２７﹒３８銀！
雖然話現價已經炒高好多，距離大行嘅「他屐」水位可能唔多，估值都偏高。不過今日魚缸乏力佢都可以逆市彈起，博客就覺得石藥短線動力依然充足，雖則話些少整固在所難免，但有貨者都可先坐實喇。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
