RSS訂閱 花旗國同神州早排先話可以傾返計，但向來鬼咁硬頸嘅侵侵（特朗普）一直對花旗國最新嘅貿易數據耿耿於懷，事關對神州嘅貿易逆差又再創新高，搞到侵侵相當冇面，淪為一隻無牙老虎，所以侵侵就迫不及待話，最快喺今日公布落實對２０００億美金神州商品徵收關稅，令原來飽受「山竹」摧殘嘅香江更顯蕭瑟，魚缸今朝最多蒸發咗５２３點報２６７６３，守唔住二萬七同條十天線（２６９６３點）。
魚缸一片愁雲慘霧，多隻重磅藍戰士亦都相繼潛水，但中移動（００９４１）竟然逆市跑出，第三季至今已經升咗近１２巴仙。其他重磅街坊就全線走低，企鵝（００７００）唔見咗近兩成，ＡＩＡ（０１２９９）同生發發（００３８８）就蒸發咗約７巴仙，大象（００００５）就跌咗超過７巴仙，恒指亦碌低超過７巴仙。
作為神州電訊大佬，中移動已經係「無敵是最寂寞」，收入同客戶增長空間已經到達天花板，好難再有進一步嘅擴闊空間，但佢每年派息都愈嚟愈豪爽，今年中期息多咗近１３巴仙，舊年末期息亦大嗱嗱多咗超過２７巴仙。德銀早排就唱好中移動，認為佢嘅未來幾年派息比率提升嘅趨勢唔會消失，目前手持淨現金高達３０００億元人仔，料未來派息有相當保障。
雖然中移動已經係龍頭，但隨住神州近年大搞５Ｇ，更將會喺２０２０年開始大規模商用，網速快咗嘅情況下，神州缸友嘅數據使用量大大提升之餘，高端客嘅比例可以提高，而中移動嘅每用戶平均收入（ＡＲＰＵ）有龐大嘅增長空間，前景無疑可以睇高一線。
技術上，中移動自七月中起築雙底反彈，並形成一條明顯嘅上升軌道，而中移動目前股息率高達４﹒５厘，預期喺波動市下會繼續吸引唔少資金買入，可以趁回調至７５蚊附近買入作防守部署。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
