RSS訂閱 魚缸上個禮拜勁彈近１８００點後，雖然前日（５日）縮返五百幾點，但好友似乎仍然對後市感到樂觀，噚日尾市喺本地薑磚頭同個別重磅藍戰嘅帶動下，尾市升幅一度最多擴至逾２００點，埋單都有１８６點落袋。今朝個勢都唔差，輕微高開４點後一度守唔住二萬六，但今日輪到中資金融佬發力，缸友更加係無視麥格理調低四大行「他屐」，魚缸最多反彈１６５點。
不過，大市氣氛雖然好似有好轉，但成交好似並無太大配合，噚日成交都唔夠９００億銀，資金都係流入個別板塊炒作，而噚日就有唔少今年入缸兼回落咗唔少嘅半新丁炒高，頹咗一排嘅教育佬都有Ｄ鑊氣。
教育佬近呢三四個月都插咗唔少，天立教育（０１７７３）喺７月１２日以招親價２﹒６６銀入缸，同月３０日一度飆高至３﹒７銀，但跟住好快就進入潛水狀態，上個月底更加係低見１﹒１８銀，由高位回落嘅幅度高達６８巴仙，喺咁多隻街坊入面算係回得比較急。而最受大行青睞嘅一哥楓葉教育（０１３１７）就由六月頭創下嘅山頂位７﹒６３銀開始碌落山，直到１０月頭跌至３﹒０１銀開始築底徘徊，到上個禮拜開始反彈。
＊龍頭楓葉教育就放榜，「他屐」可上望百天線＊
事實上，目前神州中產階級不斷狀大，民間消費力亦愈嚟愈勁，神州家長喺子女教育嘅開支上面亦都愈嚟愈爽。而阿爺上個月出台新一輪個人所得稅改革，免稅額提升至５０００蚊人仔，仲可以享受子女教育同繼續教育等專項附加扣除。而習大大日前喺進博會開幕式上表示，會放寬教育行業外資股比限制，有利作為龍頭嘅楓葉有望可以吸引更多外資，進一步擴大市佔率。
截至今年二月底止上半年，楓葉喺神州同加拿大有７７間學校，盈利增長３１巴仙，至２﹒３６億人仔。楓葉由於係８月作年結，都差唔多係時候派成績表，喺學生人數不斷有增長下，加上一年學費都有近４萬人仔，「孖屐」都憧憬佢業績有唔錯表現。加上近排教育佬有鑊氣，又同時有政策支持兼唔受貿易戰影響，預期會繼續有資金追捧，可考慮現價買入，「他屐」可以上望百天線（約５蚊水平）。另外，天立教育之前回落咗唔少，反彈嘅幅度或者會較其他街坊勁，短線現價買入博反彈亦都係一個唔錯嘅選擇。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
