RSS訂閱 ５Ｇ概念大佬們近排好威威，事關有傳祖國５Ｇ牌照將會喺年底之前頒發，中國工程院院士鄔賀銓喺粵港澳大灣區院士峰會都表示，以５Ｇ建設嚟講，祖國唔會比發達國家遲，而祖國一旦開始使用，就會輕易超過其他國家，因為祖國赢在用家多咁話。
另外，喺「孖屐」行情又回暖嘅情況底下，未來５Ｇ開啓嘅投資確定性，可以話係非常高。魚缸近排都冇乜好消息，有政策扶持兼預期會有利好消息出嚟嘅板塊都容易獲資金追捧，缸友們可以留意具５Ｇ概念，且係神州光纖行業龍頭嘅長飛光纖（０６８６９）架！
中美貿易戰爆發後，阿爺要求今年要大力加快集成電路同５Ｇ嘅研發，三大神州電訊商中電信（００７２８）、中聯通（００７６２）同中移動（００９４１）亦都加快５Ｇ試點布局，當中就會刺激光纖嘅需求，而長飛又係相關行業嘅一哥，自然可以水漲船高。
長飛成績亦都夠省鏡，上個月底（２９號）啱啱派咗成績表，截至今年９月底止，淨利潤１２﹒３７億人仔，走高超過３３巴仙；營業收入８５﹒２４億人仔，升超過一成半，每股基本收益１﹒７６銀人仔。
睇返公仔圖，股價由６月７號就開始瀡滑梯，喺上個月底（３０號）仲低見１８蚊，創超過一年新低，期間急插４８巴仙，累積唔少跌幅。睇返噚日Ａ場５Ｇ概念佬嘅霸氣反彈力度，就知道佢地來勢洶洶。缸友們不妨趁低價入手，現價買入博反彈啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
