RSS訂閱 魚缸近排真係搞到缸友一念天堂，一念地獄，兩個禮拜前先勁彈近１８００點，但啱啱過去嘅一個星期就回吐返約９００點。而Ａ場走勢更加係氣勢如「熊」，兩個禮拜前先彈起７７點，但上個星期就插足５日，啱啱好蒸發咗７７點。
而重磅大佬ＱＱ（００７００）就即將喺今個禮拜三（１４日）派成績表，但績前就唔多被「孖屐」睇好，接連有幾間大行降佢「他屐」，高佬就最新由４７６蚊降到去３９７蚊，降幅都有成１７巴仙。除非企鵝成績真係遠高於預期，否則績前同績後都好難會有運行。
魚缸後市睇嚟都係悶市居多，資金偶然都係流入個別有題材概念嘅股份，而今日Ｄ神州火電佬就全線升咗唔少。事實上，今年上半年煤價都升咗唔少，阿爺就開始睇唔過眼，話煤價高咗Ｄ，只此之後，煤價就碌返嚟。而煤炭作為火電佬嘅主要燃燒來源，加上而家火電仍然係神州嘅主要發電來源，嚟緊冬天喺華北地區會有唔少缸友開暖爐取暖，刺激第四季用電量急速上升，即係有利火電佬下半年業績表現。
＊神州電力今年預測ＰＥ不足十倍，大幅跑輸其他街坊＊
提到最頹最落後嘅火電佬，神州電力（０２３８０）可以話係「冇得輸」，喺今年６月頭高見２﹒２０９銀兼創下年內新高後就急速下插，直至１０月尾低見１﹒４９銀喘定後先開始跳吓彈床。神州電力業績已經較去年大有改善，今年頭三季多賺近４３巴仙，整體收入都多咗超過１８巴仙；而舊年全年就賺少咗６成６，總收入只係多咗６巴仙。
估值方面，神州電力今年預測市盈率十倍都冇，市帳率更只有０﹒４５倍，大幅跑輸其他街坊，而股息率更加有６﹒１厘，短線值博率都算幾吸引。神州電力而家喺低位喘定，加上又有用電需求急升呢個概念炒作吓，不妨考慮喺現價吸納，「他屐」上望返條百天線（１﹒７２９銀）。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
