RSS訂閱 就快過農曆年啦！雖然２０１８年大市由高位傾瀉，但股票呢啲嘢點都會有時節性，所以就算跌市入面都可以略略炒作下。而１月份通常炒作嘅股份就係消費股同濠賭股，但神州近期ＣＰＩ指數都差過預期，所以消費股都唔使點望。
唯一焦點就落係濠賭身上，而目前濠賭面對問題，除咗禁煙帶來嘅影響，重包括中國人外出旅遊消費意欲、中美貿易戰同續牌影響，照咁計，買啲大隻嘅陀地包穩陣，首選梗係銀河娛樂（０００２７）啦。
其實銀娛一直佔馬交嘅市場百份比好高，而且都積極向外發展，係早前菲律賓賭場出小小意外之外，其他業務發展唔錯。加上大行睇今年新年馬交賭收可能會略略反彈，對濠賭都有正面作用，重點佢係係本地薑，中美貿易戰同續牌之間問題對佢影響不大，所以面對風險相對較細。
另外，港珠澳大橋通車都對馬交有利，而馬交輕軌「寄望」今年下半年營運，更加方便遊客。大行瑞銀睇銀娛「掃貨」，「他屐」ＳＥＴ６２﹒５銀，主要因為銀娛係去年已經完成１５０個吸煙休息室建設同審批，所以可以抵消禁煙影響；而因為政府更加批准銀娛進行第三期擴建，預料２０２０年中期開幕，第四期就係２０２１至２０２２年開。
銀娛自去年１０月見過１年低４０﹒３銀後，近期股價都維持係４６至４８銀之間，相信１月及２月濠賭數據將會成為股價波動原因，缸友可以分注入貨，目前４６蚊可以先入一注，「孖屐」預計１月數據可能因為高基數效應而出現負增長，屆時股份下跌既話可以再溝淡；而２月份數據普遍分析都睇好，所以溝淡完可以睇股價係３月初公布數據前可唔可以反彈到５０銀左右，就沽曬食胡差不多啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
