RSS訂閱 神州噚日出台嘅進出口數據走咗樣，上月出口按年跌超過４巴仙，進口更急插近８巴仙，「孖屐」對神州經濟增長衰退嘅憂慮再次升溫，香江魚缸噚日借勢急回近４００點。雖然數據唔多理想，但人仔走勢仍然夠硬淨，守得住６﹒８關。
不過，國家發改委今日再度出嚟救火，表示要繼續強化逆周期調節，並要實施更大規模嘅減稅降費。加上舊年全年新增人仔貸款達到１６﹒１７萬億銀，同比多咗２﹒６４萬億銀，呢項數據都暫時證明神州經濟又唔算咁差。
另一方面，中央又再出嚟強調要救經濟，「孖屐」都預計，中央或者好快會有新政落地，再加上中美貿談已算有所進展，侵侵（特朗普）亦都忙於花旗國政府停擺而無暇多注意貿易戰，再升溫嘅可能性大大降低，大市氣氛自然轉好。而且，聯儲局頻頻放鴿，美金持續腳軟，種種因素下，人仔理應可以繼續反彈。
＊信行若能企穩４﹒８銀，有望上試５蚊水平＊
魚缸同人仔走勢好轉，頹咗一排嘅內銀股亦都迎來低位反彈嘅機會，眾多街坊入面，中信銀行（００９９８）預測市盈率只有４﹒５倍左右，市帳率亦只有０﹒４８倍，預測股息率更高達６﹒８３巴仙，博有唔錯嘅反彈空間，信行可以作為街坊首選。
除咗人仔升值呢個催化劑外，發改委今日亦都話會繼續實施積極嘅財政政策同穩健嘅貨幣政策，即係話人行有好大機會會再次降準放水，對內銀淨息差有正面作用。技術上，信行已於今個月頭喺４﹒５７銀，即係約１年低位築底回穩，而呢幾日都係處於橫行區間，若成功企穩橫行區頂部４﹒８銀，則有望挑戰５蚊「他屐」。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
