RSS訂閱 人仔近排反彈回升，加上喺油價走低同埋旅客需求增加嘅帶動之下，「孖屐」對中資鐵鳥們嘅前景都開始變得樂觀，連帶屐飛（００２９３）前景亦看好！
屐飛最近就公布咗上年１２月嘅客貨運量數據，載客量錄得３１０﹒５８萬人次，走高１﹒８巴仙；乘客運載率就有８３﹒８巴仙，較前年同期減少０﹒８個百分點；運力升５﹒８巴仙。不過，貨運量就要走低，運載貨物同埋郵件合共錄得１８﹒３萬噸，走低４﹒９巴仙；貨物運載率亦要仆低４﹒２個百分點至６７﹒７巴仙，運力就維持不變。
高佬都「十卜」屐飛，噚日（１６日）就發表報告指，該公司上年１２月營運數據大致都符合孖屐預期，管理層亦表示收益率有改善，對股價而言，絕對喺正面利好嘅消息。該大行又睇好屐飛２０１９年嘅盈利表現，相信今年盈利會大幅彈高兩倍至三倍，最後畀咗「買貨」評級過佢，他屐由１７﹒２銀微升至１７﹒３銀。
睇返個公仔圖，該股自從喺去年１０月底低見９﹒８１銀之後就開始反覆向上，至今累積升幅超過兩成，加上該公司供求關係見復甦，成本結構又得到改善，缸友們不妨待股價回落至保力加通道中軸約１１﹒２４銀吸納，作中長線投資之用啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
