RSS訂閱 一年一度ＱＱ（００７００）業績大會，就喺「超級星期四」（２１日）出爐啦！同大家做個賽前檢討先。
過去一年ＱＱ股價真係坐過山車咁款，首先就係同「今日頭條」打晒交咁，ＱＱ完全封殺「抖音」，然後又喺社交平台互相攻擊，缸友花生都唔夠食；之後神州中宣部曾一度暫停審批遊戲版號，嚇到缸友急急拋貨，雖然近兩個月都開返審批，但個速度慢到喊，都唔知幾時有大作出爐。
花旗最近就出個Ｒｅｐｏｒｔ，分析下ＱＱ同網易有咩大作，其中ＱＱ將會推出紙牌類遊戲「執劍之刻」；而網易就會推出「繪真．妙筆千山」，更會推出「堡壘前線」去憾ＱＱ推出嘅「要塞英雄」，睇怕新一輪嘅龍爭虎鬥快將出現。
之但係，花旗對ＱＱ都係睇高一線，主要因為「完美世界」已經推出市面，呢隻「驚」點解咁受追捧？因為想當年係電腦版時候「參考」遊戲巨頭「魔獸世界」而製造出來嘅「東方版」，所以市場預料有機會興起「手機拆副本」嘅熱潮。雖然預料到「王者榮耀」（ＨｏＫ）增速方面按月出現放緩現象，但寄望其他遊戲可以填補。
另外，ＱＱ個雲業務係市場佔比上一路都擴張緊，係上年ＱＱ重組公司後，公司特登開一個新部門關於雲業務，就知道佢幾咁重要。據業界人士指出，未來十年雲業務將會係電腦界嘅變天，因為透過雲計算，大家第日可能連電腦主機都唔需要，只要有簡單嘅輸入輸出裝置，然後用雲端計算，除咗一般嘅文書工作、打機之外，重可以係股票市場衍生好多用途。
雖然目前雲端收入佔唔係好多，但係買股梗係趁佢低時後入貨架嘛！花旗睇「他屐」４１３銀，匯證就睇４０４銀，德銀就睇淡小小，得３３７銀。話雖如此，但相信ＱＱ放榜前後都會有一段炒作，依家股價已經炒到最高３６８銀，建議缸友們可以分注追，現價入一注，過３７０銀入多注，如果下跌就溝到３６０收手，第一關可以參考大行「他屐」４００銀！ＱＱ依家都重係上升通道，所以睇中長線依然揸得過！
《編者按》本欄搜羅即市傳聞，惟消息未經證實，《經濟通》亦不保證內容之準確性。
WoW WoW星期三：健康網購產品低至$99 (只限今天)► 立即行動
