RSS訂閱 近排魚缸內房板塊熱炒，一來係部分龍頭好似碧桂園（０２００７）業績好過「孖屐」預期，二來都因為三月頭又再提出嘅神州房產稅估計因為立法問題複雜，短期之內都唔會落實，造就唔少內房股都被睇好，潤地近期創左新高，加上二月銷售數字幾靚，相信仲有得升！
先睇番啲神州地產大數先，國家統計局最新公布，二月份一線城市新房售價按年漲逾４巴仙，比起上個月仲升多左近１巴仙，睇嚟一、二線城市嘅住宅銷售開始出現復甦嘅跡象啦。而潤地喺２月份嘅總合同銷售達到９０億人仔，按年增幅有成接近１９巴仙；之前１月份更達到１６３﹒９億銀，按年增長四成六，有相當嘅發展潛力。
＊潤地近２９蚊水平有支持＊
大行麥格理都睇好潤地嘅基本面，今個星期發表報告就話，潤地舊年跑贏其他街坊，股價升幅有成３１巴仙，主要由於佢嘅合約銷售增長、租賃業務同其他基本因素都強勁。雖然今年至今股價仲差少少，但相信受合約銷售同埋旗下商場表現支持，仍然維持跑贏「孖屐」嘅評級，最新「他屐」自３４﹒５７銀，上調到３８﹒１９銀。
睇埋潤地嘅股價走勢，佢由星期一（１８號）創咗３４﹒０５銀嘅歷史新高之後，股價就連跌四日，落到接近１０天平均線嘅水平（約３１﹒９銀）。之前潤地喺舊年１２月同今年１月都曾經突破３０蚊，無幾耐就回落番，但都喺２８﹒８６銀水平彈番起，估計２８蚊係一個較強嘅支持位；更重要嘅係佢嚟緊下星期二（２６號）放榜，好大機會會再衝一衝高，缸友不妨趁３０蚊低位分注吸納，如果跌穿２８蚊就好走人啦。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
