RSS訂閱 魚缸噚日（２５日）大跌近六百點，係兩個星期以來嘅低位，滬深股通更加單日淨流走１０７億人仔，係歷來規模第二大。大家都擔心魚缸會唔會喺升咗接近４５９０點（由今年１月３日低位２４８９７升至３月１９日高位２９４８６）之後來個大調整。不過，缸友又唔使睇到咁淡住嘅，因為睇返公仔圖啊，現時５０天線（２８２０５點）已經升破２５０天線（２８１０９點），形成「黃金交叉」，而且今日（２６日）魚缸又再彈返些少，缸友們可以觀望埋今個星期中美貿易開會傾成點，再作打算。
「炒股唔炒市」都係今期魚缸嘅主旋律，噚日博客喺跌市嘅時候就喺魚缸周圍逛，睇吓有無邊隻逆市強勢嘅魚毛，啊！又畀博客搵到喎，而且仲有大成交配合，講緊嘅就係上個星期先公布咗業績嘅利基（００２４０）啊。
睇睇公司盤數先，上年截至去年１２月底止年度純利有４﹒１２億銀勁升咗１﹒２倍，每股盈利３３﹒２仙，派末期息４﹒４仙增加近４７巴仙；營業額６３億銀升約逾５巴仙，毛利仍約８﹒５４億銀升８４﹒５巴仙。
利基可以喺上年大環境咁多不明朗因素下，純利勁升咗１﹒２倍，好大程度都係因為集團以新會計準則入帳，以工程完成進度，而唔係整個工程完成先計數，令到純利大大提升。但剔除呢個因素，利基本身都承接咗多項大型土木工程項目，包括填海、中九龍幹線同機場客運大樓工程等，集團都話土木工程業務年內已經拎咗逾１００億新合約，而尚未完成工程價值總額仍有１８０億。
其實，同行入邊幾間工程承建商都相繼出事，當中以接沙中線嘅禮頓應該最為缸友們熟悉，禮頓就因為鋼筋接駁問題，已經被暫停投標資格為期一年。來緊極具爭議嘅「明日大嶼」，亦希望喺年內取得研究撥款，如果將來成事，對利基現時發展同股價都會有一定幫助，所以缸友們都要留意相關嘅報導。
睇返公仔圖，呢隻魚毛過去幾年都喺低位整固，但噚日就創咗逾１７年新高（１﹒３９銀），仲有大成交配合，以股息角度去睇，現時息率有３﹒２厘唔算吸引，不過股價由上年１０月９號０﹒５９銀到噚日高位計，升幅已經近１﹒３６倍，以過去呢幾個月嘅經驗，佢升咗一陣之後都會回一回再創高位，有膽博嘅缸友不妨現價買入，但想穩陣啲嘅缸友，可以等佢回到１﹒１２銀嘅位置入貨，但如果之後穿１銀缸友都要走人啊。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
