RSS訂閱 講開近呢幾日嘅熱炒板塊，光伏佬都算升得唔錯，因為個別股份最新嘅成績表唔錯，加上嚟緊即將進入光伏裝機嘅旺季，預計可以帶動光伏玻璃嘅價格上升，依家部署定光伏股係良機。
今日博客同大家介紹嘅就係福萊特玻璃（０６８６５），佢早前都被交銀國際列為行業首選，評級就繼續同孖屐同步。睇返佢嘅基本面，相比起龍頭信義光能（００９６８）嘅盈利同毛利率，福萊特玻璃呢兩方面表現都仲未及信義，但喺上半年嘅盈利增長已經開始改善，達到按年增加兩成三至２﹒６２億人仔；而信義同期卻要少賺兩成二至９﹒５３億銀。
另外，睇埋個行業前景，雖然今年１１月國家對光伏發電嘅補貼政策會有所調整，但喺今年推行嘅其他扶助項目仍可以促進對光伏玻璃嘅需求。睇返公司今年上半年嘅業績報告，裡面引述神州光伏行業協會嘅數據，２０１９年上半年神州光伏新增裝機不足１２ＧＷ，但預料今年落實左嘅戶用光伏項目、光伏扶貧項目同特高壓配套外送等項目，可將年內可建成並網嘅裝機容量提升至３５ＧＷ－４５ＧＷ左右，所以下半年行業會出現強勁增長。
再加上神州推動清潔環保能源嘅國策背景，光伏股呢類新能源板塊長遠都可以部署下。由公仔圖上睇，福萊特玻璃今日隨板塊急漲，已經由上星期股東減持導致股份急跌嘅低位回升返，已經連開三支陽燭，１４天ＲＳＩ逐步靠近５０嘅水平，顯示佢有潛力繼續追落後。短線部署可以睇住守唔守到條１０天線約３﹒８嘅水平，屆時買入可以上望返上個月嘅平台大概４﹒５銀。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
