RSS訂閱 近日有關小米（０１８１０）嘅利好消息可以話接連而來，先係恒指公司宣布可納入同股不同權股份入指數成分，而小米自己都算爭氣，喺疫情市況下首季成績表現仍然可以高於「孖屐」預期。不過今日佢都係跟住個市一齊滑低，博客認為現階段或者可以先趁機撈一手。
小米近日就公布今年首季成績表，純利雖然下跌三成，但仍然好過市場預期；不過喺經調整淨利潤方面反而仲可以升一成，至２３億人仔。瑞信就喺報告話，小米目前海外市場銷售已經有五成，而且喺內地５Ｇ手機市場佔比１４巴仙，相信佢下半年前景正面。再加埋花旗國封鎖華為，小米或者可以從中受惠。
不過，小米除咗整電子產品出色，喺投資方面一樣都出色。之前小米就認購咗喺花旗國納斯達克上市嘅金軟（０３８８８）旗下雲業務金山雲，當時小米認購咗２３５萬股，「孖屐」推算可以獲利１６０１萬美金，料可以有利公司成績表。而今日小米又再次出動，現金加新股增持Ｚｉｍｉ Ｉｎｔｅｒｎａｔｉｏｎａｌ，擬加強高端智能手機配件及智能硬件嘅研發同製造。
從公仔圖睇，至恒指公司上周五（１５日）收後後公布宣布同股不同權（ＷＶＲ）和第二上市公司可以納入恒生指數、國指後，小米就累計抽升近一成，仲突破埋疫情爆發前嘅蟹貨區（約１３銀附近），相信小米有機會進一步突破之前１４銀嘅高位。今日（２２日）小米股價跟隨大市急挫回落到靠近十天線（約１２﹒０９２）附近，博客認為可以趁回調先吸納一注，博反彈到１４﹒５銀，不過如果跌穿１０﹒５銀就要止蝕。
《編者按》本欄搜羅即市傳聞，惟消息未經證實，《經濟通》亦不保證內容之準確性。
WoW WoW星期三：健康網購產品低至$99 (只限今天)► 立即行動
