RSS訂閱 噚日同大家講完中芯(00981)，今日博客同大家講下另一隻芯片股華虹(01347)，事關公司同樣公布咗第一季業績，表現如何呢？
華虹公布，截至今年3月底為止，第一季純利1.03億美金，按年升2.1倍；每股盈利0.079美金。期內，銷售收入5.95億美金，按年都升95.1%；毛利率就有26.9%，按年升3.2個百分點，就咁睇表現都唔錯啵。
噚日都有提到，有傳美國有意擴大對中國地區芯片製造公司嘅半導體設備出口禁令。華虹都有回應呢個傳聞，指喺進出口方面亦建立完備合規管控程序，有美國商務部VEU(the Validated End-User)，經驗證最終用戶嘅資格，至今仲擁有VEU資格，同大家派定心丸。
另一樣嘢要留意嘅係，華虹宣布董事會已經批准建議發行人民幣股份喺上交所科創板上市，發行人民幣股份數目不超過約4.34億股，即不超過經擴大股本嘅兩成半，募集資金或約180億人仔。
股價走勢嚟講，華虹由舊年11月尾高位53.75銀開始回落，今年3月最低見過25.2銀，今個星期一曾經跌穿埋呢個位，最低見23.2銀，之後幾日跌勢喘定啲。今日因為業績沖喜，曾經升超過9%。
不過，博客留意到股價由舊年11月尾開展嘅下降軌當中，出現「一頂低過一頂」嘅形態，並且受制於50天線。依家主要平均線走勢仍向下，整體走勢都係偏弱。仲有，華虹預測市盈率約15倍，比起同行中芯嘅約10倍都仲要高少少，再加埋受中美角力影響嘅風險較大，即使會喺內地上市，博客相信華虹短線反彈空間唔會太大，好可能喺20天線28.5銀左右有阻力，有貨嘅朋友可以趁反彈離場！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
