今日博客同大家睇下眾安在綫(06060),公司今年第一季淨利潤1.99億人仔,按年跌約24%,保險業務收入約49.59億元。近日公司就公布今年頭4個月獲得原保險保費收入總額約66.12億人仔,比舊年同期升11.61%。
事實上,內地保險業情況似乎有啲改善。中國保險行業協會近期發表報告,2021年互聯網財產保險累計實現保費收入862億人仔,按年增長8%,比財產險行業整體保費增速高出7個百分點。報告亦指出,2021年保費規模前十間保險公司當中,眾安保險、人保財險、太保產險、平安產險、國壽財險等市場份額按年都升咗,眾安保險保費收入貢獻增量有37億,係互聯網財產保險保費增長明顯嘅其中一間。
報告建議,隨著互聯網財產保險業態發展多元化,發展潛力大,保險公司應該繼續大力發展互聯網保險核心專業能力,尤其係加強自營平台建設。互聯網財險愈嚟愈多,相信眾安在綫會有更多發展嘅機會。
咁點樣部署好呢?睇番眾安在綫嘅日線圖,股價今年3月最低跌到18.2銀後反彈,並且橫行整固緊,但由4月以來分別升過上去28.25銀、28.45銀同28.75銀,但之後都無以為繼,似乎去近29銀就有阻力。即使依家10天線升穿20天線,股價亦企穩喺10天線之上,MACD亦開始出現牛差,但現價同29銀亦愈嚟愈近,博客覺得短線值博率唔算太高,無貨嘅朋友可以等股價落番24.5銀先部署,收市跌穿22銀就止蝕。
《編者按》本欄搜羅即市傳聞,惟消息未經證實,《經濟通》亦不保證內容之準確性。
全新節目《說說心理話》青少年不可以戀愛!?真實個案講述驚心動魄經歷► 即睇