RSS訂閱 今日魚缸高開243點後，升幅一度擴大到超過450點，上番20400點樓上，主要因為ATM為首嘅科技股發威。另外，車股同樣升得勁，比亞迪(01211)曾經升超過6%，吉利(00175)盤中更加升超過7%，「蔚小理」全部升超過半成，就連霉咗一排嘅長汽(02333)同廣汽(02238)升勢都非常凌厲。車股朝早升到嘭嘭聲，依家入手趕唔趕到上車呢？
睇番上海市汽車銷售行業協會發文，指4月新冠疫情對上海車市造成嚴重影響，全上海汽車經銷商因封控幾乎都處於停業狀態，4月汽車銷售係零。至於1至4月新車銷量仍然維持喺3月份嘅11.8萬輛水平，按年跌咗47.6%。
另外，乘聯會公布4月汽車銷量118.1萬架，按年跌47.6%，但係新能源商用車1.9萬，按年上升38.8%，滲透率8.8%，甚至創咗歷史新高。同埋，上海全市16個區已全部實現社會面清零，嚟緊會分階段解封，有16個重大項目都已經復工。博客覺得「孖屐」懶理上海4月汽車零銷量嘅消息，反而憧憬上海解封可以令車廠重投生產，從而改善到銷量表現。
事實上，去到目前為止，比亞迪同吉利大戶主動買沽比率高達84:16，資金淨流入額亦超過8億銀，而廣汽嘅大戶主動買沽比率更加去到89:11，大戶銀彈投入嘅程度都唔講得笑，都睇得出佢哋對車股今日有相當大信心。暫時頭五隻最佳藍籌當中，比亞迪同車股都上榜，升幅更加跑贏ATM添。
部署方面，博客攞比亞迪同吉利做例子，佢哋依家升破早前嘅橫行區。比亞迪成功升破244銀阻力，10天同20天線向上行，保歷加通道開始擴闊，目前9 RSI係66，相信短期升勢可以維持。用黃金比率回調指標，由舊年全年高位324.6銀向下量度到今年低位165銀，下一個目標估計會0.618倍反彈位嘅263銀。至於吉利就突破今年4度挑戰嘅13銀阻力位，技術走勢同比亞迪差唔多，短線目標可以2月22日裂口低開嘅高位16銀水平。
etnet榮獲HKEX Awards 2023 「最佳表現證券數據供應商」大獎► 了解詳情
