早排因為直播帶貨而急升嘅電視廣播(TVB)(00511),最近有指被股東減持套現。根據聯交所資料,美資基金股東Dodge & Cox繼上星期四(9日)TVB高位嗰陣沽貨之後,上星期五(10日)再按每股平均價11.1812銀,減持391.33萬股,套現4375.54萬銀,持股量由8.08%降至7.19%。連埋Dodge & Cox上星期四以平均每股13.0498銀,沽出600.61萬股,套現7837.84萬銀計,兩日合共套現1.22億銀。
事實上,TVB股價喺3月9日先升後跌,曾經衝上去17.9銀,走勢急劇回落,最後跌14.93%收市,之後一日都跌超過4%。再睇早排TVB股價彈起,主要因為散戶炒上去。基金股東趁高位即刻減持,更加睇到呢段升勢嘅「炒味」極濃。
另一點要留意嘅係,TVB預計2022年財政年度的EBITDA將錄得約3.38億銀虧損,比2021年同期有所擴大,股東應佔虧損大約喺7.9億銀至8.3億銀範圍內,亦都比2021年同期擴大。公司解釋,香港電視廣告市場喺上年度大部分時間仍然疲弱,抑制廣告收入增長。同時,上年度內地受到廣泛防疫措施限制,公司嘅內地聯合製作業務有所放緩。
雖然早排TVB同淘寶合作嘅線上直播帶貨成績唔錯,但實際收入同結果仍然要時間印證,近日又無乜炒作消息,近幾日成交額明顯急降,係時候睇番現實狀況喇。股價今朝曾經跌超過15%,進一步跌穿10天線,嚟緊業績出埋可能會再跌多浸,隨時落番去4銀附近。即使股價近幾日跌得幾多,依家都唔好亂咁衝入去住。
《編者按》本欄搜羅即市傳聞,惟消息未經證實,《經濟通》亦不保證內容之準確性。
全新節目《說說心理話》青少年不可以戀愛!?真實個案講述驚心動魄經歷► 即睇