RSS訂閱 近排鋰價跌咗唔少，鋰礦股捱咗一排，贛鋒鋰業(01772)股價更加由2月初開始不斷碌落去，連續幾個星期都係跌住收。
贛鋒噚日公布上年度未經審核嘅業績快報，純利204.78億元按年增長2.92倍，每股盈利10.17元，扣除非經常性損益後嘅純利199.28億元，按年5.85倍。期內收入約418億元，升2.7倍，加權平均淨資產收益率61.36%，升30.32個百分點。集團指上年度純利上升，主要因為鋰鹽價格有較大幅度上升，同埋鋰電池銷售提升。
雖然業績表現唔差，但舊年鋰礦股受惠鋰價飆升，今年為止走勢明顯轉弱。除咗因為鋰礦擴產項目急增，碳酸鋰價格大幅下跌，多間新能源車企展開減價戰，反映內地對新能源車需求放緩，對電池行業嘅供應同需求產生壓力，鋰礦股當然受拖累。
贛鋒上日大跌超過5%，更曾經跌到45.4銀。不過，今日因為業績消息而高開1.31%，早段走勢平穩。上日雖然有支大陰燭，但今日暫時見到小陽燭，燭身畀噚日支大陰燭包住，出現「身懷六甲」嘅利好轉向形態。如果今日收市都保持住呢個形態，短線估計仲有得反彈。
事實上，上日9日RSI跌到12，股價已經嚴重超賣得好緊要，出現技術性反彈都唔出奇嘅。想買贛鋒嘅朋友，依家可以小注博反彈，短線目標54.5銀(20天線附近)，失守40銀止蝕。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
