RSS訂閱 花旗國魚缸噚晚（２５日）繼續水漲船高，道指抽升２３２點，納指更加升破六千關破頂，今朝（２６日）股王ＱＱ（００７００）破頂下帶領呢邊魚缸升番百幾點，勁！
港府同中電（００００２）以及港燈（０２６３８）傾好數，准許回報率由目前近一成降到去８巴仙，環境局局長黃錦星仲估電費有得減半成以上。瑞信就話呢兩間都會首當其衝，前者七成利潤來自香江，後者更係百分百。美銀美林就話８巴仙好過間行嘅７巴仙預期，而且協議期延長到１５年，中電投資資本回報率（ＲｏＩＣ）可以升到１２巴仙，更加將目標價由９１蚊升到９６蚊。
其實調整對港燈比較不利，中電仲可以靠外國業務賺番多Ｄ。而港燈息率勝在較高，有接近６厘，而中電得３厘幾，但考慮到日後減電費將會影響兩電派息，而市場上其他收息股股息率有５厘以上都唔少，鍾鐘意收息嘅缸友，入多Ｄ其他收息股例如Ｒｅｉｔｓ同香港電訊
（０６８２３）等等好過。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
