RSS訂閱 「侵侵」減稅計劃無甚細節，搞到依家兩日花旗魚缸都冇嚟神氣，香江呢邊升咗４日之後，今朝（２８日）終於要抖一抖。博客相信，孖屐走勢仲係唔錯，雖然下星期初神州放五一黃金周大假，北水欠奉下，魚缸想再推高要等一等，但法蘭西大選依啲潛在黑天鵝可以話已經一掃而空，「五窮」魔咒有望打破。
季績期即將結果，正係好時機搵返一兩隻績優股。中交建（０１８００）首季淨利３１﹒４億人仔，按年增逾３６巴仙，新簽合同金額亦增長逾四成，比起街坊中車（０１７６６）少賺
４２巴仙、中車時代（０３８９８）純利跌１５巴仙，表現實在好太多。
「侵侵」上台近百日，已著手推動醫改同稅改，另一重大政策承諾「１萬億美元基建計劃」相信都會喺未來幾個月公布細節，對基建股有帶動氣氛作用。美銀美林亦預期，人仔貶值減慢，海外收入會有增幅，近年積極發展海外訂單嘅中交建可以睇高一線。
中交建整固期間於１０﹒５銀左右見大支持，現價可吸納，憧憬疏浚業務分拆上市成真，目標１２銀。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
