RSS訂閱 網上、電話騙案頻生，警方成日呼籲市民，要再三核實對方嘅身份，唔好隨便將錢存入陌生人嘅戶口。唔好以為只有新移民、比較少留意新聞嘅長者先會中招，就連一啲市值數以千億美金計嘅巨企都未能幸免，講緊嘅係谷歌同ｆａｃｅｂｏｏｋ，真係講你都唔信！
花旗國上個月拉咗一名立陶宛籍男子，涉嫌用虛假電郵詐騙兩間科技公司，但嗰時未有公開係邊兩間企業，啱啱至由《財富》雜誌爆出嚟。
據報，依位高級騙徒偽造咗台灣製造商廣達電腦嘅發票、印章，甚至提供埋包括有蘋果、亞馬遜嘅客戶名單，以假亂真。谷歌同ｆｂ見廣達電腦有同開其他矽谷街坊做生意，就毫無戒心，將電腦器材費用存入對方嘅銀行戶口，大嗱嗱畀人呃走咗超過１億美金！
消息出街之後，谷歌同ｆｂ都冇辦法唔出嚟認自己老貓燒鬚，但兩個都強調自己好快就發覺唔對路，報咗警亦追得返資金。不過，有人就批評兩間公司想隱瞞受騙，對投資者不公。
電視都講得多「騙徒手法層出不窮」，盈盈囉嗦啲再次提醒各位缸友，小心不明來歷嘅電郵同埋來電啊！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
