RSS訂閱 北京早排展開撒離「低端人口」行動，相信有唔少同胞都要返「老家」或者要遷到鄉村居住。同時馬雲喺今日（１１日）就公布咗個「馬雲鄉村師範生計劃」，實行要培育新一代嘅鄉村教育家咁話。打算喺鄉村落地生根嘅「新鄉民」，就唔使怕下一代唔知點樣「出人頭地」啦。
阿里巴巴集團主席馬雲講到，鄉村老師年齡層趨老化，先至令神州目前嘅教育較薄弱。為見及此，佢預計喺１０年之內，至少投放３億人仔，為國內應屆教育系嘅Ｆｒｅｓｈ Ｇｒａｄ嚟個「大選拔」！
呢個項目計劃下年１月２１號正式啟動，先投放１０００萬人仔，選出１００位畢業生，仲為佢地每人提供長達５年發展機會，同埋１０萬人仔嘅資助添架。
另外，首批合作院校包括有湖南第一師範學院、四川師範、重慶師範，同埋吉林師範大學四家院校，選拔完咗之後，佢地仲會派到去一線嘅鄉村學校，進行３到６個月嘅實習，其後仲要接受一個「職業發展導師」考核，再通過埋呢個「Ｆｉｎａｌ Ｉｎｔｅｒｖｉｅｗ」，咁就可以當選為「鄉村準老師」！聽完之後，盈盈覺得，要被選中都真要「過五關，斬六將」，其困難程度簡直可以追得上報考香江公務員添！
不過馬雲呢個計劃簡直為祖國村民「雪中送炭」，相信仲可幫到唔少窮家子弟添；長遠而言，村民嘅教育水平就可望提高，仲可以拉近喺省城居住嘅學子的距離。
古人教落「書中自有黃金屋」，若然成功，今鋪直情可以讓「舉國神州人富起來」！
《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
