RSS訂閱 講起智能電話，相信大家第一下就會諗起唉瘋（ｉＰｈｏｎｅ）又或者三星（Ｓａｍｓｕｎｇ），間唔中都可能會提下Ｓｏｎｙ同ＬＧ個名。最受歡迎當然就係畀人咬咗一啖嘅蘋果（Ａｐｐｌｅ），每次開賣新機，都吸引到一眾果粉一大朝就去排隊。不過原來依個唔係佢哋嘅專利，近排有部被視為可以同「唉瘋Ｘ」鬥過嘅國產機喺紐約開賣，場面都一樣咁墟冚！
呢部新機，就係祖國品牌一加（ＯｎｅＰｌｕｓ）推出嘅「ＯｎｅＰｌｕｓ ６」喇！相信唔少人同盈盈一樣，對一加嘅認識係零，真係估唔到喺外國係咁受歡迎。據一加所講，全球有超過１﹒５萬人排隊買喎。
今次推出嘅呢部「ＯｎｅＰｌｕｓ ６」，望上去同賣到成萬蚊部嘅「唉瘋Ｘ」差唔多，都有個「Ｍ字額」，不過系統當然就係用安卓（Ａｎｄｒｏｉｄ）喇。雖然無「唉瘋Ｘ」嘅無線充電同抗水等功能，但佢嘅價錢只係５３０美金（約４１３４港紙），部分性能同「唉瘋Ｘ」都可以鬥吓。
即使唔少排隊嘅粉絲，兩個月前先追完三星嘅Ｇａｌａｘｙ Ｓ９，不過都話完全唔介意咁快又換機，佢哋指出嘅原因係，喺一加或者Ｇｏｏｇｌｅ嘅裝置上面，較易搵到版本相對乾淨同簡單嘅安卓系統。雖然三星機有機會重新設計系統，但變相性能就可能無咁好，不過呢個講法當然就未有任何實質根據喇。
之不過探子回報，走喺紐約街頭嘅人，大部分人都仲係拎住唉瘋或者三星。即使有途人八卦，走過隊伍問發生咩事，唔少人都係唔識呢個品牌。睇嚟一加要全面打入外國市場，都仲有好長嘅路要行。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
