RSS訂閱 神州有淘寶，花旗國就有亞馬遜，只要缸友諗到嘅，網上係冇咩買唔到，但有一位大媽勢估唔到，連上網買廁紙都可以上新聞。近排有一位花旗國大媽好如常地喺亞馬遜幫公司買三箱廁紙，之後就揀咗兩日到貨服務，正當呢位大媽以為一切都好正常嘅時候，原來只係暴風雨前嘅寂靜。
一個禮拜都唔使，嗰三箱廁紙終於送到，跟住再睇一睇佢銀行戶口，一睇就眼都凸埋，運費竟然有成７４５５美金，而廁紙嘅價錢都只係８８﹒１７美金，呢個天價運費係廁紙價錢嘅近
８５倍。雖然呢位大媽「時運低」，不幸被收取天價運費，但睇嚟佢見慣風浪，因為佢相信亞馬遜呢個大牌子唔會呃人，加上又係亞馬遜嘅高級Ｍｅｍｂｅｒ，諗住好快就可以搞掂呢單嘢。
不過，據呢位大媽透露，佢之後打咗好多次去客服，但亞馬遜職員每次一見到呢個天價運費只係忍唔住大笑同覺得不可思議，似乎有一種幸災樂禍嘅心態。事實上，亞馬遜有唔少貨都係透過第三方賣家銷售，所以亞馬遜有Ｄ唔負責任，都只係將賣方嘅電話比咗大媽要佢自己處理。
點知大媽話個電話打極都冇人聽，最後只好寫電郵比亞馬遜嘅老細貝佐斯反映被收取天價運費呢件事。雖然亞馬遜之後都話天價運費完全違反公司嘅政策，但呢位大媽前前後後搞足超過兩個月，呢筆運費先退返畀佢。大媽似乎都仲係對亞馬遜嘅服務好有信心，都只係反映成件事嘅過程，並無表達出好憤怒嘅情緒，之後仲同箱廁紙嚟個合照，果然係見慣風浪。不過，嬲又有咩用，亞馬遜依家獨大成個花旗國線上購物「孖屐」，唔用佢又可以用邊個平台呢？《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
