RSS訂閱 花旗國聯儲局噚日（１９日）起一連兩日議息，「孖屐」期望會等到第三季度先再度加息，之後就維持息率不變。聯儲局早前表示，會對調整息口存有耐性，推動香江收租大佬今年走勢強勁。加上人仔匯率漸趨穩定，１月份香江零售銷售又轉強等等嘅正面因素帶動，大佬們再次走高當然Ｎｏ Ｐｒｏｂｌｅｍ。博客睇好隻太古地產（０１９７２）啦！
聯儲局將會喺香江時間聽日（２１日）凌晨公布議息決定。根據利率期貨顯示，本周維持息率不變的機會率達九成九有多。有分析更預測，短期利率水平將會Ｋｅｅｐ住至。「孖屐」對加息嘅預期轉淡，令息口敏感嘅收租佬密密見資金追捧。
大摩上日（１９日）亦唱好太古地產，預料今年港島東嘅租金將會走高一成，幅度較其他地區為高。該行解釋，由於中環灣仔繞道開通之後，交通時間將會縮短兩成至１８分鐘，太地身為港島東區最大嘅業主，早前亦公開表示，會喺該區增加更多項目。該行分析，太地將會成為租金上升嘅主要受惠者，所以畀咗「增持」評級過佢，「他屐」由３３銀升至３７銀。前途無可限量架！
睇返個公仔圖，該股自從１月１１日見底後回升，期間累積升幅約２５巴仙，噚日仲高見３３﹒８５銀創上市新高，建議缸友待股價稍作調整入貨！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
