RSS訂閱 環球各地魚缸走勢點勁，相信唔使盈盈講都有目共睹，單係計一計香江恒指，由年初低位２４８９７點至今，已經升咗近１８巴仙。睇埋各類商品，「經濟寒暑表」油價都開始收復唔少失地。「孖屐」風險胃納開始增加，缸友都應該ｆｅｅｌ到，不過大家可能唔知，連之前弱勢嘅比特幣（Ｂｉｔｃｏｉｎ）都開始反彈，更加有分析話今年會係比特幣嘅牛市！
睇返公仔圖先，比特幣近日重返４０００美金關口，係自上年１２月中低見３２３２﹒５１美金以嚟首次，計一計數由低位已經反彈咗近兩成四，升幅跑贏恒指！亦喺二百天線平均線上持續反彈。
比特幣由２０１７年１２月高位約２萬美金跌落嚟，但孖屐對虛擬貨幣信心仍然不滅。早排大停電嘅委內瑞拉因為動亂，開始廣泛使用比特幣。有消息亦講到，由納指阿媽洲際交易所集團（ＩＣＥ）推出嘅比特貨期貨平台Ｂａｋｋｔ亦會快將面世。唔單止呁，上一個月傳統大行「細摩」都推出「ＪＰＭ Ｃｏｉｎ」（摩根幣）試水溫，用佢嚟畀大客應用喺跨國結算支付同證券交易。
不過，有唱好就當然有唱淡，上個星期芝加哥期權交易所，作為第一間推出比特幣期貨嘅交易所已經因為交易量持續萎縮，而暫停發行新嘅比特貨期貨，現行合約最後一宗交易去到６月就會到期。
比特幣由高位到依加已經唔見成八成有多，大家巧驚驚，而連近日風頭躉股壇長毛Ｄａｖｉｄ Ｗｅｂｂ曾經講過比特幣係全球首個分散式龐式騙局。所以學電視廣告咁話，潛在風險唔細，缸友如果要入貨，真係要量力而為啊！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
