RSS訂閱 科技愈來愈先進，就好似返學唔使帶書，用部ｉＰａｄ就可以睇到電子書，依家就連錢都好快可以唔使帶，因為Ｆａｃｂｏｏｋ就計劃緊２０２０年嘅第一季實施電子支付系統，內部統稱為Ｇｌｏｂａｌ Ｃｏｉｎ（全球幣）。
今次ｆｂ非常認真，創辦人朱克伯格（朱仔）除咗上個月會面咗米字國央行行長卡尼，就「全球幣」去討論實行嘅機會同加密貨幣嘅風險，仲搵咗花旗國財政部官員尋求有關運營，同監管問題嘅建議。之後仲搵埋西聯匯款等匯款公司進行緊一系列嘅商談。睇嚟今次ｆｂ非要推動「全球幣」不可。ｆｂ話佢哋搵咗咁多人，都係想用戶能夠用最便捷嘅方式收錢同過錢，最重要喺無銀行戶口嘅人都用得！
咁究竟ｆｂ嘅電子貨幣喺點用呢？佢就話虛擬貨幣可以用嚟畀錢買現實世界中嘅嘢，例如畀酒店房錢同買下嘢食咁。而錢呢就可以放喺網上嘅錢包裡面，用戶之間仲可以匿名咁發送添。
ｆｂ聲稱會提供價格合理、且安全嘅付款方式畀用戶，等佢哋可以更加方便咁將錢過嚟過去。咁樣聽落啲錢傳嚟傳去，好似好兒戲咁，所以今個月頭嗰時，花旗國國參議院同銀行委員都分別寫咗封信俾朱仔，詢問下佢啲貨幣究竟會點樣運作，同埋之後會點樣保護到消費者利益同用戶嘅數據。
雖然仲未知用呢種幣到底安唔安全，但ｆｂ旗下嘅ＷｈａｔｓＡｐｐ同Ｉｎｓｔａｇｒａｍ未來都計劃推出加密貨幣，佢哋都話希望能夠打破現時嘅支付障礙，而且可以減低消費者嘅成本。今個暑假ｆｂ就會公布更多詳細嘅資料出嚟，大家敬請留意下啦。依家銀行連戶口都唔使就可以過數畀人，盈盈覺得世界變得太快，畀錢嘅方法天花龍鳳，真係跟唔得上，不過歡迎各位可以匿名咁送錢畀盈盈架。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
