RSS訂閱 即將步入冬季，又到燃氣股發圍嘅時候啦！而博客睇好板塊入面嘅中國燃氣（００３８４），建議可以做返個中、長線部署！
中燃氣最近都有唔少好消息，最近就宣布同廣東省發改委訂立廣東省大灣區清潔能源項目戰略合作協議，更加同多區政府合作，包括江門市、肇慶市及清遠市等等。而全資附屬深圳市中燃電力發展亦都同廣州市從化區科技工業商務，同信息化局訂立投資項目合作協議，將就氣化鄉鎮、液化石油氣微管網項目、液化天然氣接收站、熱電及分布式能源及交通新能源四大方面開展合作，以上種種都可以睇出公司大力擴展燃氣管道同範圍，博客相信計劃推行之後會利好佢地業績表現。
而據知美國資本喺上星期四（１５日）都增持咗中燃氣逾１１０１萬股，每股均價２２﹒９２銀，涉資２﹒５２億銀，而最新持股量增至逾８巴仙，反映到股東對中燃氣嘅信心。同時大行都睇好中國燃氣表現，今個星期就有野村睇好佢地簽戰略合作協議，認為係公司戰略改變嘅早期跡象，顯示中燃氣將更專注喺長遠盈利能力，相信可以提升到市場對公司嘅投資情緒，所以維持「買入」評級，目標價都維持３３銀。而今日麥格理都重申咗對中燃氣嘅「跑贏大市」評級同目標價３５銀，睇嚟孖屐對中燃氣嘅睇法樂觀。
睇返公仔圖，中燃氣今日造五連陽，見到升幅開始收窄，似乎都係時候回一回先啦！博客就建議可以等回到比較穩陣嘅十天線約２２﹒８銀位置時吸納，做返個中長線部署。睇返股價由７月開始走低，依家似做圓底，希望可以襯冬季期間利好再衝上２８銀水平，如果到時氣氛Ｋｅｅｐ住好，就可以上望今年初高位約３２銀水平。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
